Gusto ko kaw pintahun

pero pula lang ang duag kang akun tagipusuon

indi makabuta sa imong panurukan

nga gahandum kang balangaw sa kalangitan.

Gusto ko magsulat kang binalaybay kag sugidanun

agud isaysay kanimo ang akun baratyagun

ugaring wara it nagakaangay nga metapora kag tinaga

sa pagpugung kang mga nagailig nga luha.

Gusto ko ikaw kantahan imaw sa mga nagalinupad nga kapispisan

ugaring mas gusto mo nga akun labawan

ang limug kang mga anghel kag kerubin sa kalangitan

indi ko masarangan asta sa akun rulubngan.

Gusto ko man daad nga bisan sara lang kon may matuman

kag bisan maghandum pa ako kang wara't kasiguruhan

sa gihapon sundon ko ang akun nabatyagan

hay ang pagpalangga ko kanimo, bukun kabutigan.