"ဂျောင်ဝူး ဒီအခန်းဆိုတာသေချာလား"

"သေချာပါတယ်ကွ ငါသေချာစုံစမ်းလာတာကို"

"ဒါဆိုဘာလို့ခုထိမတွေ့သေးတာလဲ"

စီနီယာတို့အခန်းဟုဆိုသော စာသင်ခန်းထောင့်တွင် ရပ်စောင့်နေသည်မှာတစ်နာရီပင်ပြည့်တော့မည်ာကျောင်းသားများ တစ်ယောက်ပြီးတစ်ယောက်ထွက်လာသော်လည်း သူတွေ့ချင်နေသောသူမှာမူပေါ်မလာသေး။

"ဒါမှမဟုတ် ကျောင်းမလာတာများလားဟင်"

"အေး ဒိုယောင်းပြောတာဖြစ်နိုင်တယ် ငါတို့စောင့်နေတာလဲကြာလှပြီကို ပြန်ရအောင်ရူတိုရာ"

တကယ်ပဲ ကျောင်းမလာတာလား။တကယ်ကြီး ဒီလိုပဲလှည့်ပြန်လိုက်ရတော့မလား။

"လာပါကွာ"

ဒိုယောင်းက လှမ်းဆွဲတော့ ဂျောင်ဝူးက

"ခဏ ဟိုမှာ ဟိုမှာ မင်းစီနီယာမလား"

ဂျောင်ဝူးညွှန်သည့်ဘက် သူလှည့်ကြည့်လိုက်တော့ ဟုတ်ပါသည် ပန်းချီစာအုပ်ရှည်ကြီးပိုက်ကာထွက်လာသော ကျွန်တော့်ရဲ့အနုပညာလေး။

"ဟေ့ရောင် သွား သွားတောင်းပန်တော့"

ဒိုယောင်းက ရှေ့ကိုတွန်းလိုက်တော့ မလှမ်းမကန်းမှာရှိတဲ့ စီနီယာနဲ့အတော်လေးပင်နီးကပ်သွားကာ ရှေ့တွင်ပိတ်လျက်သားဖြစ်နေသည်။

စီနီယာက မတော်တဆသူ့ရှေ့မှာပိတ်ရပ်နေသည်ဟုထင်နေပုံပင်။မိမိအားရှောင်ဖယ်ကာ ထွက်သွားတော့မည်ဆဲဆဲတွင်

"ဟို စီနီယာအာဆာဟိ"

စီနီယာ့နာမည်လှမ်းခေါ်လိုက်တော့ခြေလှမ်းများရပ်တန့်သွားပြီးနောက် သူ့ထက်အရပ်အနည်းငယ်မြင့်သောမိမိအားမော့ကြည့်လာသည်။

"ကျွန်တော် ကျွန်တော်တောင်းပန်ချင်လို့ပါ"

စီနီယာကသဘောမပေါက်စွာဖြင့်မျက်နှာရှုံ့ကာကြည့်နေသည်။

"ဟိုနေ့က ကွန်ပျူတာဆောင်ရှေ့မှာတိုက်မိခဲ့တဲ့တစ်ယောက်ပါ အဲ့နေ့ကကျွန်တော့်ကြောင့်စီနီယာ့ပန်းချီကပျက်စီးသွားတဲ့အတွက်အနူးအညွန့်တောင်းပန်ပါတယ်"

"ထားလိုက်တော့"

"အဆင်ပြေမယ်ဆိုကျွန်တော်တစ်ခုခု"

"မင်းကဘာလုပ်ပေးနိုင်မှာမို့လို့လဲ အဲ့ပန်းချီကိုအရင်အတိုင်းပြန်ဖြစ်အောင်လုပ်ပေးနိုင်လား"

"ဗျာ အဲ့တာက"

"မင်းမလုပ်ပေးနိုင်ဘူးမလား စိတ်ထဲကထုတ်လိုက်တော့ ငါတောင်ပျက်စီးသွားတဲ့အရာတစ်ခုအ‌တွက်နဲ့စိတ်ရှုပ်မခံနိုင်လို့ မေ့ပစ်လိုက်ပြီ ဒါပဲမလား သွားတော့မယ်"

စီနီယာဟာသူပြောချင်တာတွေပြောပြီးထွက်သွားခဲ့ပေမယ့် မိမိမှာသူ့ရဲ့အေးစက်စက်စကားတွေကြောင့် ငြိမ်သက်နေခဲ့ရတယ်။တကယ်ပဲ စီနီယာကသူထင်ထားတာထက်ကို အများကြီးအေးစက်တဲ့လူသားပဲ။

"ရူတို အဆင်ပြေရဲ့လား"

"ငါပြောသားပဲ မလွယ်ဘူးလို့"

"လာပါကွာ ပြန်ရအောင်"

"ငါ ငါဘယ်လိုလုပ်သင့်လဲဟင်"

"ဘယ်လိုမှမလုပ်နဲ့ ဟိုကမင်းကိုတောင်မှတ်မိလို့လား"

"အဲ့လောက်အောက်ကျခံမနေပါနဲ့ ငါ့ကောင်ရာ မင်းကိုကြိုက်တဲ့ကောင်မလေးတွေ ကောင်လေးတွေမှတစ်ပုံကြီး ဘာလို့သူ့ကိုပဲရွေးမှာလဲ"

"ငါကသူ့ကိုပဲသဘောကျတာလေ မင်းတို့သိပါတယ် ငါလေ ငါတစ်စုံတစ်ယောက်ကိုအလွယ်တကူသဘောမကျတတ်ဘူးဆိုတာ"

"ရူတိုရာ"

ဒိုယောင်းနဲ့ဂျောင်ဝူးကသူ့အားသနားစရာကောင်းသည့်ပုံဖြင့်ကြည့်သည်။တကယ်လည်း ဒီအချိန်မှာသူ့လောက်သနားစရာကောင်းတဲ့သူမရှိလောက်တော့ဘူးထင်ပါတယ်။

"ရူတို"

အိမ်ပြန်လမ်းတွင် သုံး‌ယောက်သားတိတ်တိတ်ဆိတ်ဆိတ်လမ်း‌လျှောက်နေရင်း ဒိုယောင်းကသူ့ကိုရုတ်တရက်ခေါ်လိုက်သည်။

"ဟင်"

"မင်းသူ့ကိုတကယ်ချစ်တယ်ဆိုရင် လက်လျှော့လို့မဖြစ်ဘူး"

"ဒိုယောင်း!မင်းဘာလို့သူ့ကိုသွားမြှောက်ပေးနေရတာလဲ!"

ဒိုယောင်းစကားကို ဂျောင်ဝူးက ဒေါသထွက်စွာပြန်တုံ့ပြန်သည်။

"ငါမြှောက်ပြောနေတာမဟုတ်ဘူး ဂျောင်ဝူး မင်းတို့တကယ်ချစ်တဲ့သူ တစ်ခြားတစ်ယောက်လက်ထဲပါသွားမှနောင်တရနေမှာစိုးလို့ငါပြောနေတာ အဲ့တော့မှနောင်တရလို့လည်းဘာမှမထူးဘူး"

"ငါနောက်မဆုတ်ပါဘူး နောက်ဆုတ်ဖို့လည်းမတွေးဖူးဘူး မင်းပြောသလိုငါနောင်တလည်းမရချင်ဘူး ဒိုယောင်း မင်းတို့ ငါ့ကိုကူညီမယ်မလားဟင်"

"ငါတို့ကူညီတယ်ဆိုတာ မင်းဘေးနားရှိပေးယုံပဲရမယ်ရူတို မင်းတို့ကြားထဲငါတို့ဝင်ပါလို့မှမရပဲ မင်းမှာဝမ်းသာစရာရှိရင်ငါတို့အတူပျော်ပေးနိုင်မယ် ဝမ်းနည်းစရာရှိရင်တော့ ငါတို့နှစ်သိမ့်ပေးနိုင်မယ် မင်းအတွက်ငါတို့ကအင်အားဖြစ်နေပေးမယ် ငါတို့လုပ်နိုင်တာဒါပဲရှိတာ ရူတို"

ဒီတစ်ခါတော့ခါတိုင်းလိုပြောင်ပြောင်ပျက်ပျက်ပြောတတ်တဲ့ဂျောင်ဝူးမဟုတ်တော့ပဲ အစ်ကိုတစ်ယောက်လိုလေးနက်စွာဆုံးမနေသည့်ဂျောင်ဝူးဖြစ်သွားသည်။

"‌မင်းတို့ရှိတယ်ဆိုတဲ့အသိနဲ့တင် ငါအားရှိပါတယ် မင်းတို့ကို ဒီတစ်ခါတော့တကယ်ကျေးဇူးတင်ပါတယ်"

"ဒါပေမယ့်တစ်ခုတော့ရှိတယ်ရူတို မင်းသူ့အချစ်ကိုသေချာပေါက်ရမယ်လို့တွက်ထားလို့မဖြစ်ဘူး ဘာလို့လဲဆိုတော့ မျှော်လင့်ထားတာမဖြစ်တဲ့အခါ ပိုပြီးနာကျင်ရတယ်ဆိုတာမင်းကိုသိစေချင်ယုံပါ"

"ငါမှတ်ထားမှာပါ ဒိုယောင်း သူ့ကိုအပိုင်ရဖို့မတွက်ထားသလို ဒီအတိုင်းငါ့အချစ်တွေကိုနားလည်ပေးရင်ကောင်းမယ်ပဲမျှော်လင့်မိတယ် ငါ့ကိုနားလည်ရင်အနည်းဆုံးတော့ သူ့ဆီကအေးစက်မှုတွေလျော့သွားမှာပါ"

ဂျောင်ဝူး နဲ့ ဒိုယောင်းတို့ကိုလမ်းခွဲကာတစ်ယောက်တည်းပြန်ခဲ့ပေမယ့် အိမ်ရောက်သည့်တိုင်အောင်စိတ်ကမတင်မကျဖြစ်ကာနေရခက်နေဆဲ။
မိဘတွေကိုတောင်ပြန်ရောက်ကြောင်းသေချာမနှုတ်ဆက်လိုက်မိပဲအိပ်ခန်းထဲသို့သာတန်းဝင်မိသည်။

ကုတင်ပေါ်သို့ မိမိကိုယ်ကိုပစ်တင်လိုက်ကာ ဆက်တွေးနေမိသည်။မနေ့ကထက်အများကြီးပြောင်းလဲသွားသည်ဟုသူ့ကိုယ်သူထင်ပါသည်။တကယ်ကို မနေ့ကတောင် စီနီယာအကြောင်းတွေတွေးရင်း စိတ်ကူးယဉ်ရင်း ပျော်နေမိသေးတာပဲ။ဒါပေမယ့်ဒီနေ့တော့ဆက်ကျင်ဖက်အခြေအနေမှာ။အချစ်တွေကအစ မ‌နေ့ကနဲ့မတူ ဒီနေ့တော့ပိုတိုးကာချစ်မိနေသည်။

Tin (မက်ဆင်ဂျာမှစာဝင်သံဖြစ်သည်)

ဖုန်းကို‌ကောက်ကိုင်ကာ noti bar အားအရင်ကြည့်လိုက်သည်။အရေးကြီးကိစ္စမဟုတ်လျှင်ရင်ဝင်မကြည့်ချင်သောကြောင့်ပင်။

မိမိတို့စာသင်ခန်းဂရုချက်မှဖြစ်သည်။အရေမရအဖက်မရချည်းသာပြောနေကြတာမို့ လျစ်လျူရှုမည်အလုပ်တွင် တစ်စုံတစ်ယောက်ပြောသောစကားကသူ့အားဝင်ကြည့်ဖြစ်အောင်ဆွဲဆောင်နေသည်။

- သရုပ်ဆောင်မေဂျာကစီနီယာဂျယ်ဟော့က 5yr friendship ဆိုပြီး ပန်းချီမေဂျာကစီနီယာ အဆာဟိနဲ့ဓာတ်ပုံကိုတွဲတင်ထားတာလေ -

- အင်း တွေ့တယ် သူတို့ကအရမ်းလိုက်တာပဲ ဒီအတိုင်း စီနီယာဂျယ်ဟော့ကိုငါမရလည်း စီနီယာဆာဟိနဲ့ဆို သဘောကျတယ် -

- စီနီယာ ဂျယ်ဟော့ ? the whole king ကိုပြောနေကြတာလား omg သူကအရမ်းချောတာ  -

- ကျေးဇူးပြုပြီးတစ်ယောက်လောက်ပို့ပေးလို့ရမလား ငါမမြင်ရသေးလို့ -

Instagram မှ screen shot ရိုက်ထားဟန် ဓာတ်ပုံကိုမြင်ပြီးတစ်ခြားဘာကိုမှအာရုံမစိုက်နိုင်အောင်မျက်လုံးတွေပြာသွားရသည်။လွန်ခဲ့တဲ့နှစ်တွေကဓာတ်ပုံဟောင်းလေးထင်ပါတယ်။ငယ်ရွယ်မှုတွေကိုအထင်းသားမြင်နေရတယ်။မရယ်မပြုံးလို့စက်ရုပ်လို့တောင်နာမည်ကြီးတဲ့စီနီယာကလေ ပြုံးရယ်နေတာများ အမြင်ကပ်စရာ။ဘေးကဂျယ်ဟော့ဆိုတဲ့လူကြီးကလည်းဘာကွာလို့လဲ အတော်လေးပျော်နေတဲ့ပုံပါပဲ။စီနီယာပြုံးတာကိုသေလောက်အောင်မြင်ချင်ခဲ့ပေမယ့် တကယ်တမ်းသူ့ကြောင့်မဟုတ်ပဲတစ်ခြားတစ်ယောက်ကြောင့်ပြုံးနေတာက ရင်နာဖို့ကောင်းလိုက်တာ။