a pagbulong ka mga nagabalatian

May mga pamaagi ang maaram

Dara ang sangkilod nga luy-a

Tana nagabanyus, nagahuyup

Nagapanguy-ab sa paghimulso 

Nagatig-ab, nagaampo, nagapamati

laygay ka mga papu, hutik ka mga surog 

Odoy, nasalapuan mo ang katul sa sapa 

Kang nagaparigos ang mga kama-kama 

Odang nga nagaduyu-duyu, dungan mo ginkawat, 

Gindakup ka morokpok, gindara sa marayu

Ang kaaraydan nga ginahandum

Masapwan sa pagpanglighot sa talon

Sa pagkali ka mga gamot

pagkutul ka mga dahon

pag-utod ka mga balagun

pagpuksi ka mga prutas

Agud itambal, ipainum, ipakaun

Kar-on nga panahon, dara ang stetoskop 

Ang maaram nga duktor nagapamati

Nagapanguy-ab sa kakulang ka turog

Nagapuksi ka papil sa pagsulat ka bulong

Talon ka mga parmasya ang lighuton

Ugaring masiuk kag makataragam 

Dyang bag-ong talon ka siyensya kag medisina

Ginagamhan ka "Big Pharma" nga morokpok 

Kag mga kama-kama nga dalok sa kwarta

Bukut katingalahan ang pagbalik sa sinauna nga talon 

Sa pagtuon ka mga tradisyon, pagkilala sa mga papu

Liwan sa pagkali ka mga gamot, pagkutul ka mga dahon.