Pagsirak kang adlaw

Nakabati ako kang hinugyaw

Kang mga imaw ko sa balay

Hay may nag-abot kuno nga lin-ay.

Dalidali ako nagbangon

Nami pa raad magpanimuron

Piro akun gid lantawun

Kon sin-o ang lin-ay nga matahum.

Wara pa ako ka panglimog

Dayon ko run panaog

Nakunyag man ako mamati

Bisan indi maghiribati.

Nagatalikod ang lin-ay nga nag-abot

Ugaring nagbalikid sa akun pamangkot

“Ano ra ang nagapanghamot?”

Abaw, si Karya gali ang nag-abot.

“Ay, si Karya gali dya?”

“Huud, Lola Selyang,” sabat na kag magbisa

“Kathy run tawag mo kanakun umpisa kadya, 

Amo ra ang tawag kanakun sa banwa.”

Abaw, andut islan pa gid ang ngaran?

Indi makuntento sa gintugro kang ginikanan

Nga may dara angga nga indi matupungan,

Ugaring sundon gid ang ana nauyunan.

Sigi lang, pasugtan hay nalipay man ako

Nga makita ang akun pinalangga nga apo

Sa sobra ka kinadlaw ako ginhapo

Nga nadugangan kang agwa nga akun ginhaklu.